కింగ్స్ లెవెన్ ఘోర పరాజయం...!

ఐపీఎల్ 2018 సీజన్‌లో కింగ్స్ ఎలెవన్ పంజాబ్‌ జట్టుపై రాజస్థాన్ రాయల్స్ ప్రతీకారం తీర్చుకుంది. రెండు రోజుల క్రితం పంజాబ్‌ చేతిలో ఓడిన రాజస్థాన్.. మంగళవారం రాత్రి జైపూర్ వేదికగా జరిగిన మ్యాచ్‌లో 15 పరుగుల తేడాతో గెలుపొంది ఓటమికి బదులు తీర్చుకుంది. టోర్నీలో ప్లేఆఫ్ ఆశలు నిలవాలంటే తప్పక గెలవాల్సిన ఈ మ్యాచ్‌లో తొలుత బ్యాటింగ్ చేసిన రాజస్థాన్ జట్టు.. ఓపెనర్ జోస్ బట్లర్ (82: 58 బంతుల్లో 9x4, 1x6) దూకుడుగా ఆడటంతో నిర్ణీత 20 ఓవర్లలో 8 వికెట్ల నష్టానికి 158 పరుగులు చేసింది. అనంతరం ఛేదనలో కేఎల్ రాహుల్ (95 నాటౌట్: 70 బంతుల్లో 11x4, 2x6) ఆఖరి బంతి వరకూ అజేయ పోరాటం చేసినా పంజాబ్‌ను గెలిపించలేకపోయాడు. ఆరంభంలోనే క్రిస్‌గేల్ (1), అశ్విన్ (0) కరుణ్ నాయర్ (3) వికెట్లను చేజార్చుకోవడం ఆ జట్టు విజయావకాశాల్ని దెబ్బతీసింది. ఒక ఎండ్‌లో కేఎల్ రాహుల్ ఒంటరి పోరాటం చేసినా.. అతనికి సహకారం అందించేవారు కరవయ్యారు. అక్షదీప్ (9), మనోజ్ తివారి (7), అక్షర్ పటేల్ (9) కీలక సమయంలో ఔటవడంతో చివరికి పంజాబ్ 143/7కే పరిమితమైంది. టోర్నీలో వరుసగా మూడు ఓటముల తర్వాత మళ్లీ రాజస్థాన్ జట్టు గెలుపొందగా.. పంజాబ్‌కు ఇది మొత్తంగా నాలుగో ఓటమి. 

అంతకముందు రాజస్థాన్ కెప్టెన్ అజింక్య రహానె (9) వైఫల్యాల బాట కొనసాగించగా.. ప్రయోగాత్మకంగా బ్యాటింగ్ ఆర్డర్‌లో ముందుకు వచ్చిన గౌతమ్ (8) నిరాశపరిచాడు. ఈ దశలో కాసేపు ఇన్నింగ్స్ నడిపించిన సంజు శాంసన్ (22: 18 బంతుల్లో 1x4, 1x6) కీలక సమయంలో ఔటవడంతో ఆ జట్టు తడబడింది. అయితే.. ఒక ఎండ్‌లో వరుసగా వికెట్లు పడుతున్నా.. జోస్ బట్లర్ బాధ్యతాయుత ఇన్నింగ్స్‌తో వరుసగా మూడో మ్యాచ్‌లోనూ అర్ధశతకం పూర్తి చేసుకున్నాడు. పవర్‌ ప్లేలో స్వేచ్ఛగా బ్యాట్ ఝళిపించిన ఈ ఓపెనర్.. మిడిల్ ఓవర్లలో ఎక్కువగా సింగిల్స్, డబుల్స్‌కే ప్రాధాన్యమివ్వడంతో స్కోరు బోర్డు నెమ్మదించింది. ఈ దశలో జట్టు స్కోరు 132 వద్ద హిట్టింగ్‌‌కి ప్రయత్నిస్తూ బట్లర్ స్టంపౌటవగా.. అనంతరం వచ్చిన స్టువర్ట్ బిన్నీ (11: 7 బంతుల్లో 1x6) సిక్స్‌తో ఊపు మీద కనిపించినా లేని పరుగు కోసం ప్రయత్నించి రనౌటయ్యాడు. చివర్లో బెన్‌స్టోక్స్ (14: 11 బంతుల్లో 1x4) ఆశించినంత వేగంగా ఆడలేకపోవడంతో రాజస్థాన్‌ తక్కువ స్కోరుతోనే సరిపెట్టుకోవాల్సి వచ్చింది. పంజాబ్ బౌలర్లలో ఆండ్రూ టై నాలుగు వికెట్లు పడగొట్టగా.. ముజీబ్ రెండు, స్టాయినిస్ ఒక వికెట్ తీశారు. 

©2018 APWebNews.com. All Rights Reserved.