రసవత్తర పోరులో రాజస్తాన్‌దే విజయం..!

 

రాజస్థాన్‌తో జైపూర్ వేదికగా ఆదివారం రాత్రి జరిగిన ఐపీఎల్ మ్యాచ్‌లో ముంబయి ఇండియన్స్ చేజేతులా ఓడింది. 168 పరుగుల లక్ష్యఛేదనకు దిగిన రాజస్థాన్ రాయల్స్ జట్టు గౌతమ్ (33 నాటౌట్: 11 బంతుల్లో 4x4, 2x6) సంచలన ఇన్నింగ్స్‌తో రెండు బంతులు మిగిలి ఉండగానే లక్ష్యాన్ని ఛేదించింది. 17.1 ఓవర్లు ముగిసే సమయానికి 125/6తో దాదాపు ముంబయి చేతుల్లోకి వెళ్లిపోయిన మ్యాచ్‌ని గౌతమ్ తీసుకొచ్చాడు. ఇన్నింగ్స్ 18వ ఓవర్ వేసిన ముస్తాఫిజుర్ 15 పరుగులు సమర్పించుకోగా.. తర్వాత ఓవర్‌లో జస్‌ప్రీత్ బుమ్రా ఏకంగా 18 పరుగులిచ్చాడు. ఈ ఇద్దరూ ఒక్కో నోబాల్ విసరడం కూడా.. రాజస్థాన్‌కి కలిసొచ్చింది. చివరి ఓవర్‌లో విజయానికి 10 పరుగులు అవసరమైన దశలో హార్దిక్ పాండ్య బౌలింగ్‌ని ఎదుర్కొని ఒక ఫోర్, సిక్స్ బాదేశాడు. ఛేదనలో సంజు శాంసన్ (52: 39 బంతుల్లో 4x4), బెన్‌స్టోక్స్ (40: 27 బంతుల్లో 3x4, 1x6) కీలక ఇన్నింగ్స్ ఆడారు. తాజా సీజన్‌లో వరుసగా రెండు ఓటముల తర్వాత రాజస్థాన్ మళ్లీ విజయాన్నిఅందుకుంది. అంతకముందు ఓపెనర్ సూర్యకుమార్ యాదవ్ (72: 47 బంతుల్లో 6x4, 3x6), ఇషాన్ కిషన్ (58: 42 బంతుల్లో 4x4, 3x6) అర్ధశతకాలు బాదడంతో.. తొలుత బ్యాటింగ్ చేసిన ముంబయి ఇండియన్స్ నిర్ణీత 20 ఓవర్లలో 7 వికెట్ల నష్టానికి 167 పరుగులు చేసింది. 

తాజా వార్తలు

©2018 APWebNews.com. All Rights Reserved.