Dry January.. లైఫ్‌ను మార్చేస్తుంది, బోలెడు ప్రయోజనాలు!

డ్రై జనవరి అంటే ఏంటి అనుకుంటున్నారా? మద్యం అలవాటున్న వారు, మందు తాగకుండా ఉండలేకపోతున్నవారు ఈ ఒక్క నెల ఆల్కహాల్‌కు దూరంగా ఉంటే బోలెడు ప్రయోజనాలు మీ సొంతం చేసుకోవచ్చు.

  • ఆల్కహాల్‌కు దూరంగా ఉండలేకపోతున్నారా?
  • ఈ ఒక్క నెల మందు ముట్టకండి
  • నమ్మశక్యం కాని ప్రయోజనాలు మీ సొంతం అవుతాయి.
 
కొత్త ఏడాది సందర్భంగా మందు మానేద్దాం అనుకుంటున్నారా? ఏడాది మొత్తం కుదరకున్నా ఈ జనవరి నెల వరకైనా మానేసి చూడండి. బోలెడు ప్రయోజనాలు మీ సొంతం అవుతాయి. అవును మందు అలవాటున్నవారు జనవరి నెలలో మద్యానికి దూరంగా ఉంటే.. బరువు తగ్గడంతోపాటు బాగా నిద్రపోతారట. యూనివర్సిటీ ఆఫ్ సస్సెక్స్ అధ్యయనంలో ఈ విషయం వెల్లడైంది. 
 
రిలాక్స్ కావడానికి, సోషల్‌గా మూవ్‌ కావడానికి, ఫ్రెండ్స్‌తో ఎంజాయ్ చేయడానికి మద్యం అలవాటు చేసుకునే వారు క్రమంగా దానికి బానిసలు అవుతారు. అలాంటి వారు ‘డ్రై జనవరి’ పాటిస్తే మెరుగైన ఫలితం ఉంటుందట. డాక్టర్ రిచర్డ్ డీ విస్సెర్ అనే సైకాలజిస్ట్ నేతృత్వంలోని పరిశోధక బృందం ‘డ్రై జనవరి’ (జనవరి నెలంతా ఆల్కహాల్దూరంగా ఉండటం)లో భాగమైన 800 మందిపైగా వ్యక్తులపై అధ్యయనం చేపట్టింది. డ్రై జనవరిలో భాగమైన వారు తర్వాతి నెలలోనే కాదు.. ఆగష్టులోనూ తక్కువగా ఆల్కహాల్ తీసుకుంటున్నారని తేలింది. 

అంతే కాకుండా సగటున వారానికి మద్యం సేవించి రోజులు 4.3 నుంచి 3.3కి తగ్గాయి. తాగే మోతాదు 8.6 యూనిట్ల నుంచి 7.1కి తగ్గింది. డ్రై జనవరి వల్ల దీర్ఘకాలంలో మందు తాగే అలవాటు తగ్గిపోతుందని డాక్టర్ రిచర్డ్ తెలిపారు. జనవరిలో మందు మానేసిన ప్రతి పది మందిలో 9 మందికి డబ్బు ఆదా అయ్యింది. పది మందిలో ఏడుగురి నిద్ర మెరుగైంది. ప్రతి ఐదుగురిలో ముగ్గురు బరువు తగ్గారు. 
 
జనవరి నెల మొత్తం ఆల్కహాల్‌కు దూరంగా ఉండలేకపోయిన వారిలో కూడా మెరుగైన ఫలితాలు కనిపించాయట. కొద్ది మొత్తంలో మందు తాగిన వారిలో.. 93 శాతం మంది దాదాపు విజయం సాధించామనే భావనకు వచ్చారట. 88 శాతం మందికి డబ్బు ఆదా కావడంతో.. 82 శాతం మంది మద్యం తాగే అలవాటు గురించి సీరియస్‌గా ఆలోచించారట. ఆల్కహాల్‌ పట్ల 80 శాతం మందికి నియంత్రణ వచ్చిందట. 76 శాతం మందికి ఎప్పుడు, ఎందుకు మద్యం సేవించాలనే క్లారిటీ వచ్చిందట. ఎంజాయ్ చేయడానికి మందేయాల్సి అవసరం లేదని 71 శాతం మంది తెలుసుకున్నారట. 70 శాతం మందిలో ఆరోగ్యం మెరుగైందట. 71 శాతం మంది మెరుగ్గా నిద్రపోయారు.67 శాతం మంది ఎనర్జిటిక్‌గా మారారు, 58 శాతం మంది బరువు తగ్గారు. 57 శాతం మందిలో ఏకాగ్రత మెరుగైంది. 54 శాతం మందిలో చర్మ ఆరోగ్యం మెరుగైంది. కాబట్టి ఒక్క నెల మందుకు దూరంగా ఉండండి.. మెరుగైన ఫలితాలు రాబట్టండి. 
©2019 APWebNews.com. All Rights Reserved.