మే 4 న టెట్ నోటిఫికేషన్..!

ఆంధ్రప్రదేశ్‌ ప్రభుత్వం రెండోసారి ఉపాధ్యాయ అర్హత పరీక్ష (టెట్)ను నిర్వహించనుంది. దీనికి సంబంధించిన నోటిఫికేషన్ మే 4 న విడుదల చేయనున్నారు. జూన్ 10 న పరీక్షను నిర్వహిస్తారు.

ఈసారి టెట్‌ను ఆన్‌లైన్‌లో నిర్వహించనున్నారు. విజయవాడలోని క్యాంపు కార్యాలయంలో విద్యా శాఖ ఉన్నతాధికారులతో సోమవారం నాడు సమీక్ష నిర్వహించిన ఏపీ మానవవనరుల శాఖ మంత్రి గంటా శ్రీనివాసరావు వివిధ అంశాలపై చర్చించారు. టెట్ అనంతరం డీఎస్సీ నోటిఫికేషన్ విడుదల చేసి, ఆగస్టులోగా పరీక్షను నిర్వహిస్తామని ఆయన పేర్కొన్నారు. ఉపాధ్యాయ ఖాళీలపై రెండు రోజుల్లో స్పష్టత నివ్వాలని అధికారులను ఆయన ఆదేశించారు. పదో తరగతి ఫలితాలను ఏప్రిల్ 29 న విడుదల చేయనున్నట్టు తెలిపారు. అలాగే పాఠశాలల అభివృద్ధికి రోటరీ క్లబ్‌తో ఎంవోయూకు విద్యాశాఖ సూత్రప్రాయంగా అంగీకరించింది.ఇటీవల నిర్వహించిన టెట్‌లో తక్కువ శాతం మంది అర్హత సాధించడంతో మరోసారి పరీక్షను నిర్వహించాలని అభ్యర్థులు, విద్యార్థి సంఘాల ప్రభుత్వాన్ని కోరాయి. ఏడాదికి రెండుసార్లు టెట్ నిర్వహించాలనే నిబంధనల ప్రకారం మరోసారి నోటిఫికేషన్ జారీచేసే అవకాశం ఉందని ఇటీవల మంత్రి గంటా శ్రీనివాసరావు ప్రకటించారు. 

గత డిసెంబరులో టెట్ నోటిఫికేషన్ విడుదల చేసిన ఏపీ విద్యాశాఖ, పరీక్షను ఈ ఏడాది జనవరి 17 నుంచి 27 వరకు నిర్వహిస్తామని ప్రకటించింది. అయితే ప్రిపరేషన్‌కు తగినంత సమయం లేదని అభ్యర్థులు ఆందోళన చెందడంతో దాన్ని ఫిబ్రవరి 5 నుంచి 15 వరకు నిర్వహిస్తున్నట్టు తెలిపింది. కొత్తగా పేపర్-3 ప్రవేశపెట్టడంతో అభ్యర్థుల్లో గందరగోళం నెలకుంది. దీంతో మళ్లీ టెట్‌ను వాయిదా వేయాల్సి వచ్చింది. దీంతో చివరిగా ఫిబ్రవరి 21 నుంచి మార్చి 3 వరకు తొలిసారిగా ఆన్‌లైన్‌లో నిర్వహించారు.

ఇటీవల నిర్వహించిన టీచర్ ఎలిజిబిలిటీ టెస్ట్‌ (టెట్‌)కు 4,14,120 మంది అభ్యర్థులు హాజరయ్యారు. వీరిలో పేపర్ ‌-1లో 57.88 శాతం, పేపర్ -2లో 37.26 శాతం మంది, పేపర్ -3లో 43.60 శాతం మంది అభ్యర్థులు అర్హత సాధించారు. 90 కంటే ఎక్కువ మార్కులు సాధించివారి అభ్యర్థులు 25 శాతం మంది ఉన్నారు.

©2018 APWebNews.com. All Rights Reserved.