నేడే ఎంసెట్ ...!

ఆంధ్ర‌ప్ర‌దేశ్‌ రాష్ట్రంలో ఎంసెట్ పరీక్షకు అన్ని ఏర్పాట్లు పూర్తి చేశారు. ఏప్రిల్ 22(ఆదివారం) ఉదయం 10 గంటల నుంచి సాయంత్రం అయిదున్నర గంటల వరకు ఎంసెట్ పరీక్ష జరగనుంది. ఆన్‌లైన్‌లో నిర్వహించనున్న ఈ పరీక్షకు హైదరాబాద్‌ సహా ఆంధ్రప్రదేశ్‌లోని అన్ని జిల్లాల్లో మొత్తం 137 పరీక్షా కేంద్రాలను ఏర్పాటు చేశారు.

ఏపీలో 131, హైద‌రాబాద్ న‌గ‌రంలో 6 ప‌రీక్షా కేంద్రాల‌ను అందుబాటులో ఉంచారు. ఈ నెల 22 నుంచి 24వ తేదీ వరకూ ఇంజనీరింగ్, 25వ తేదీన అగ్రికల్చర్, డెంటల్‌ కోర్సుల ప్రవేశ పరీక్ష జరగనుంది. ఎంసెట్‌–2018కు మొత్తం 2,76,058 మంది దరఖాస్తు చేసుకోగా, వీరిలో 1,99,332 మంది ఇంజనీరింగ్, 76,726 మంది అగ్రికల్చర్, మెడికల్‌ విభాగాల విద్యార్థులు ఉన్నారు. 

 ఎంసెట్‌ కోడ్‌ను రాష్ట్ర మానవ వనరుల అభివృద్ధి శాఖ మంత్రి గంటా శ్రీనివాసరావు ఆదివారం ఉదయం 8 గంటలకు కాకినాడ జేఎన్‌టీయూలో విడుదల చేస్తారని ఎంసెట్‌ కన్వీనర్‌ ప్రొఫెసర్‌ సీహెచ్‌ సాయిబాబు చెప్పారు. విద్యార్థులు పరీక్షా కేంద్రాలను సులువుగా గుర్తించేందుకు వీలుగా వారి హాల్‌టిక్కెట్ల వెనుక గూగుల్‌ మ్యాప్‌ సమాచారం పొందుపరిచామని తెలిపారు. పరీక్షా కేంద్రం, పరీక్ష తేదీ, సమయం తదితర వివరాలను హాల్‌టిక్కెట్లపై ముద్రించామని, ఏ రోజు ఏ స్లాట్‌ కేటాయించారో అదే సమయానికి విద్యార్థులు పరీక్షకు హాజరు కావాలని సూచించారు.  పరీక్ష కేంద్రానికి నిమిషం ఆలస్యంగా వచ్చిన కూడా లోపలికి అనుమతించబోమని అధికార యంత్రాంగం ప్రకటించింది. విద్యార్థులను గంట ముందే పరీక్ష హాలులోకి అనుమతిస్తారు. విద్యార్థులు హాల్‌టికెట్‌తో పాటు, బ్లాక్‌ లేదా బ్లూ పాయింట్‌ బాల్‌ పెన్‌, ఆన్‌లైన్‌ అప్లికేషన్‌ను పరీక్షా కేంద్రంలోకి అనుమతిస్తారు. కాలిక్యులేటర్స్‌, మ్యాథమెటికల్‌, లాగ్‌ టేబుల్‌, పేజర్స్‌, సెల్‌ఫోన్స్‌, వాచీతో పాటు ఎలాంటి ఎలకి్ట్రకల్‌ పరికరాలు నిషేధం.
©2018 APWebNews.com. All Rights Reserved.