ఎపి వెబ్ న్యూస్.కామ్

ప్రత్యేక హోదా కోరుతూ ఇంద్రజాలికుడు, అవార్డులు, రికార్డుల సాధకుల సంఘం అంతర్జాతీయ అధ్యక్షుడు శ్యామ్‌ జాదూగర్‌, ఆయన తనయుడు మోహిత్‌ కళ్లకు గంతలు కట్టుకుని చీపురుపల్లిలోని మోటారు సైకిల్‌ ర్యాలీ చేశారు.

38,808 మెట్రిక్‌ టన్నుల ధాన్యం సేకరణ

బలిజిపేట: మండలంలోని 2,824 మంది రైతుల నుంచి ఖరీఫ్‌ సీజన్‌లో 38,808 మెట్రిక్‌ టన్నుల ధాన్యాన్ని సేకరించామని వెలుగు ఏపీఎం సత్యనారాయణ తెలిపారు. మండలంలో ఏర్పాటు చేసిన పది ధాన్యం కొనుగోలు కేంద్రాల ద్వారా కొనుగోళ్లను చేపట్టి రైతులకురూ.60.15 కోట్లు అందజేశామన్నారు. మండలంలోని అజ్జాడ, పలగర, బలిజిపేట, గలావల్లి, నారాయణపురం, పెదటెంకి, పెద్దింపేట, సుభద్ర,వంతరాం, వెంగళరాయపురం గ్రామాల్లోని రైతుల నుంచి కొనుగోళ్లు చేపట్టి.. 90శాతం వరకు బిల్లులు చెల్లించామన్నారు. వెలుగు గ్రామైక్య సంఘాల ద్వారా, పీఏసీఎస్‌ కేంద్రాల ద్వారా ధాన్యం కొనుగోళ్లు చేపట్టామని ఆయన తెలిపారు.

గ్రామీణ తపాలా బీమా పథకంపై అవగాహన

బలిజిపేట: కేంద్ర ప్రభుత్వం గ్రామీణ ప్రజల సౌలభ్యం కోసం ప్రవేశపెట్టిన గ్రామీణ తపాలా బీమా పథకాన్ని అందరూ సద్వినియోగం చేసుకోవాలని పార్వతీపురం డివిజన్‌ తపాలా శాఖ డివిజన్‌ పర్యవేక్షకుడు జె.ప్రసాద్‌ బాబు కోరారు. బొబ్బిలి సబ్‌ డివిజన్‌ పరిధిలోని తపాలా శాఖ ఉద్యోగులంతా బుధవారం బలిజిపేట పురవీధుల్లో గ్రామీణ తపాలా జీవిత బీమాపై ప్రదర్శనగా వెళ్లి ప్రచారం నిర్వహించారు. ఈ బీమా పథకం గ్రామీణులకు వరంగా మారే అవకాశం ఉందని.. ఉద్యోగులంతా ప్లకార్డులు చేపట్టి అవగాహన కల్పించారు. కార్యక్రమంలో బొబ్బిలి డివిజన్‌ తపాలా శాఖ ఇన్‌స్పెక్టర్‌ ఎ.శేషారావు, 34 తపాలా శాఖల పరిధిలోని ఉద్యోగులు పాల్గొన్నారు.

రామతీర్థం.. శివమయం 

రామతీర్థం(నెల్లిమర్ల), న్యూస్‌టుడే: ఉత్తరాంధ్రలో ప్రసిద్ధి చెందిన పుణ్యక్షేత్రం రామతీర్థంలో మంగళవారం మహాశివరాత్రి ఉత్సవం ఘనంగా ప్రారంభమైంది. భక్తజన సందోహంతో అంతటా శివమయం అయింది. రామాలయంలో స్వామివారికి ప్రత్యేక పూజలు నిర్వహించారు. ఉత్తరాంధ్ర జిల్లాల నుంచి తరలివచ్చిన భక్తులు రామాలయాన్ని, శివాలయాన్ని దర్శించుకున్నారు. తెల్లవారు జాము నుంచి స్వామివారి దర్శనానికి బారులు తీరారు. ఉచిత దర్శనం, శీఘ్రదర్శనం, అంతరాలయ దర్శనాలకు ప్రత్యేక క్యూలైన్లను దేవాలయ సిబ్బంది ఏర్పాటు చేశారు. భక్తులకు ఎలాంటి ఇబ్బందులు లేకుండా బారికేడ్లను నిర్మించారు. స్వామి దర్శనం చేసుకొని తిరిగి వచ్చే భక్తుల కోసం ప్రత్యేకంగా మొబైల్‌ మెట్లను ఏర్పాటు చేశారు. దీనివల్ల ఈ ఏడాది దర్శనాలు సాపీగా కొనసాగాయి. నెల్లిమర్ల నుంచి వచ్చే వాహనాలను సీతారామునిపేట వద్ద, రణస్థలం నుంచి వచ్చే వాటిని రామతీర్థం ఉన్నత పాఠశాల సమీపంలో నిలిపివేసి ట్రాఫిక్‌ ఇబ్బందులు తలెత్తకుండా పోలీసులు నియంత్రించారు.

మహిమ గల చెంబు పేరుతో టోకరా 
ఆరుగురు ముఠా సభ్యుల అరెస్టు 

రామభద్రపురం, న్యూస్‌టుడే: మహిమ గల చెంబు పేరుతో లక్షలాది రూపాయలు టోకరా వేసేందుకు ప్రయత్నించిన ఆరుగురు ముఠా సభ్యులను రామభద్రపురం పోలీసులు సోమవారం రాత్రి అరెస్టు చేశారు. దీనికి సంబంధించి ఎస్‌ఐ డీడీ నాయుడు అందించిన వివరాలు ఇలా ఉన్నాయి. నెల్లూరు జిల్లా సూళ్లూరుపేటకు చెందిన వల్లేపు శేషగిరిని ఆరుగురు ముఠా సభ్యులు ఓ పథకం ప్రకారం మోసగించేందుకు ప్రయత్నించారు. తమవద్ద మహిమ గల చెంబు ఉందని దీన్ని ఇంట్లో ఉంచుకుంటే కోట్లకు పడగెత్తుతారని నమ్మబలికారు. మోసగించిన వారిలో పార్వతీపురానికి చెందిన శ్రీపతి కౌసల్య, నర్సీపురానికి చెందిన చింతాడ ప్రేమదాస్‌, బొబ్బిలికి చెందిన ఏగిరెడ్డి చిట్టినాయుడు, హైదరాబాద్‌కు చెందిన చింతాడ తేజ్‌మోహనరావు, బొబ్బిలికి చెందిన కోరాడ సీతారామ్‌, కొమరాడ మండలం దళాయపేటకు చెందిన గళావల్లి రవి ఉన్నారు. బాధితుడు శేషగిరితో రూ.1.13 కోట్లకు ఒప్పందం కుదుర్చుకున్నారు. ఇందులో భాగంగా రూ.30 లక్షలు తొలివిడతగా చెల్లించినట్లు చెబుతున్నారు. తానుమాత్రం పూర్తి డబ్బులు చెల్లించినా చెంబు ఇవ్వలేదని బాధితుడు శేషగిరి పోలీసులకు ఇచ్చిన ఫిర్యాదులో పేర్కొన్నారు. దీనిపై పోలీసులు అన్ని కోణాల్లో దర్యాప్తు చేస్తున్నారు. ముఠా సభ్యుల నుంచి సమాచారం సేకరించారు. బాధితుడు శేషగిరి విశాఖపట్నంలో రియల్‌ఎస్టేట్‌ వ్యాపారి కావడంతో ముఠా సభ్యులకు అక్కడే పరిచయం ఏర్పడినట్లు ఎస్‌ఐ తెలిపారు. మహిమ గల చెంబుకు సంబంధించి బేరసారాలు రామభద్రపురంలో సాగినట్లు చెప్పారు. ఆరుగురు ముఠా సభ్యులను అరెస్ట్‌ చేసి రిమాండ్‌కు తరలించినట్లు వెల్లడించారు. వీరినుంచి చెంబు, రూ.లక్ష నగదు స్వాధీనం చేసుకున్నామన్నారు.

తాజా వార్తలు

©2018 APWebNews.com. All Rights Reserved.