ముఖ్యమంత్రి స్పందించే వరకు పోరాడదాం 
రాయలసీమ న్యాయవాదుల ఐకాస 

కర్నూలు న్యాయవిభాగం, న్యూస్‌టుడే: రాయలసీమలో హైకోర్టు ఏర్పాటు చేసే విషయంలో ముఖ్యమంత్రి స్పందించే వరకు పోరాడుదామని రాయలసీమ న్యాయవాదుల ఐకాస ప్రకటించింది. శనివారం స్థానిక యునైటెడ్‌ క్లబ్‌లో ఐకాస కో-కన్వీనర్‌ నాగలక్ష్మీ ఆధ్వర్యంలో నాలుగు జిల్లాల న్యాయవాదుల సమావేశం జరిగింది. ఈ సందర్భంగా ఐకాస కన్వీనర్‌, కడప జిల్లాకు చెందిన మస్తాన్‌ వలీ మాట్లాడుతూ రాష్ట్ర ప్రభుత్వం రాయలసీమ అభివృద్ధిని నిర్లక్ష్యం చేస్తూ ఇతర ప్రాంతాలకే ప్రాధాన్యం ఇస్తోందని ఆరోపించారు. అభివృద్ధి వికేంద్రీకరణలో భాగంగా రాష్ట్ర హైకోర్టును సీమలో ఏర్పాటు చేయాలని డిమాండు చేశారు. వెనుకబడిన ప్రాంతమైన సీమను నిర్లక్ష్యం చేస్తే ముఖ్యమంత్రి తగిన మూల్యం చెల్లించుకోవలసి వస్తుందన్నారు. వి.నాగలక్ష్మీదేవి మాట్లాడుతూ ముఖ్యమంత్రి సీమబిడ్డ అయినప్పటికీ సొంత ప్రాంతానికి ద్రోహం చేస్తున్నారని, వెంటనే సీమలో హైకోర్టు ఏర్పాటుపై ప్రకటన చేయాలని డిమాండు చేశారు. గత 27 రోజులుగా న్యాయవాదులు ఉద్యమిస్తున్నా స్పందించకపోవటం విచారకరమన్నారు. త్వరలో ప్రజాప్రతినిధుల నుంచి తీసుకున్న మద్దతు లేఖలను ముఖ్యమంత్రికి సమర్పిస్తామని చెప్పారు. ఉద్యోగ, ఉపాధ్యాయ, కార్మిక సంఘాలతో కలిసి ఉద్యమం తీవ్రతరం చేస్తామని వెల్లడించారు. రాష్ట్ర బార్‌ కౌన్సిల్‌ సభ్యులు, కర్నూలుకు చెందిన రవిగువేరా, అనంతపురంకు చెందిన రామిరెడ్డిలు మాట్లాడుతూ దేశంలోని పలు రాష్ట్రాల్లో హైకోర్టులు రాజధానిలో కాకుండా ఇతర ప్రాంతాల్లో ఉన్నట్లు తెలిపారు. ఐకాస సలహాదారులు వై.జయరాజ్‌, ఎస్‌.చాంద్‌బాషా మాట్లాడుతూ ఉద్యమం ప్రజల్లోకి వెళ్లిందని, ప్రభుత్వం దిగి వచ్చేదాకా అన్ని వర్గాలను కలుపుకొని ఉద్యమిద్దామని అన్నారు. అనంతపురం ఐకాస నాయకులు భరత్‌భూషణ్‌రెడ్డి, చిత్తూరు జిల్లాకు చెందిన రవికాంత్‌రెడ్డి, ప్రొద్దుటూరు శ్రీనివాసులు, ఆదోని జీసీ రంగన్న, కర్నూలుకు చెందిన నిర్మల, ఓంకార్‌, రంగారవికుమార్‌, నంద్యాల స్వామిరెడ్డి, అనంతపురం గురుప్రసాద్‌లతోపాటు పలువురు నాయకులు పాల్గొని ప్రసంగించారు. శనివారం స్థానిక శ్రీకృష్ణదేవరాయ విగ్రహం వద్ద 28వ రోజుకు చేరిన దీక్షలో అనిల్‌కుమార్‌, ఎ.వెంకటేశ్వర్లు, చలపతిరావు, బేగ్‌, కేశవరావులు కూర్చున్నారు.

క్రీడల అభివృద్ధికి తోడ్పడతాం 
సెంట్రల్‌ జోనల్‌ బాలికల పోటీలు ప్రారంభం 

నంద్యాల క్రీడా విభాగం, న్యూస్‌టుడే: నంద్యాలలో క్రీడల అభివృద్ధికి ఎల్లవేళలా తోడ్పడతామని నంద్యాల ఎమ్మెల్యే భూమా బ్రహ్మానందారెడ్డి పేర్కొన్నారు. శనివారం స్థానిక ఎస్పీజీ మైదానంలో మహానంది మండలం గోపవరం ఉన్నత పాఠశాల, కర్నూలు జిల్లా సెకండరీ పాఠశాలల అథ్లెటిక్స్‌ అసోసియేషన్‌ ఆధ్వర్యంలో జరిగిన సెంట్రల్‌ జోనల్‌ బాలికల పోటీలకు ముఖ్య అతిథులుగా ఆయనతోపాటు విజిలెన్స్‌ అండ్‌ ఎన్‌ఫోర్స్‌మెంట్‌ కమిషనర్‌ నరసింహులు పాల్గొని జాతీయ, క్రీడా పతాకాలను ఆవిష్కరించారు. జిల్లా నుంచి వచ్చిన క్రీడాకారుల నుంచి గౌరవ వందనం స్వీకరించారు. అనంతరం ఎమ్మెల్యే మాట్లాడుతూ.. నంద్యాలను క్రీడా హబ్‌గా తయారు చేస్తామన్నారు. పద్మావతినగర్‌లోని ఇండోర్‌ స్టేడియంలో త్వరలో క్రమం తప్పకుండా సాధన చేసుకోవడానికి అన్ని వసతులు కల్పిస్తామన్నారు. అనంతరం సెంట్రల్‌ జోనల్‌ కార్యదర్శి మెహన్‌రెడ్డి మాట్లాడుతూ... రెండు రోజులపాటు జరిగే ఈ పోటీలలో నంద్యాల, కర్నూలు, డోన్‌, ఆదోని డివిజన్ల నుంచి సుమారు 500 మంది క్రీడాకారులు పాల్గొన్నట్లు తెలిపారు. అండర్‌-14, 17 విభాగాల్లో ఫుట్‌బాల్‌, హాకీ, హ్యాండ్‌బాల్‌, త్రోబాల్‌, బాస్కెట్‌బాల్‌, ఖోఖో, టెన్నీకాయిట్‌, వాలీబాల్‌, కబడ్డీ, సెపక్‌తక్రా, సాఫ్ట్‌బాల్‌, పరుగుపందెం 200 400 800 మీటర్లు, హైజంప్‌, లాంగ్‌జంప్‌, ట్రిఫుల్‌ జంప్‌, షాట్‌పుట్‌, జావెలిన్‌, డిస్కస్‌త్రో వంటివి నిర్వహిస్తున్నట్లు పేర్కొన్నారు. 26 ఏళ్ల నుంచి నంద్యాల పార్లమెంట్‌ నియోజకవర్గంలో జరుగుతున్న క్రీడా పోటీలకు ఎంపీ ఎస్పీవై రెడ్డి ఉచిత భోజన వసతి కల్పిస్తున్నారన్నారు. ఈ సందర్భంగా క్రీడాకారులు చేసిన నృత్యాలు అందరినీ ఆకట్టుకున్నాయి. ఈ కార్యక్రమంలో విశిష్ట అతిథులుగా డిప్యూటీ ఈవో బ్రహ్మంనాయక్‌, జిల్లా మాజీ ఒలింపిక్‌ సంఘం ఛైర్మన్‌ డా.రవికృష్ణ, రాష్ట్ర వ్యాయామ ఉపాధ్యాయ ఎన్నికల సంఘం ఛైర్మన్‌ పిచ్చిరెడ్డి, జిల్లా పీఈటీ అసోసియేషన్‌ ఛైర్మన్‌ శేషిరెడ్డి, జోనల్‌ ఛైర్మన్‌ మంజుల తదితరులు పాల్గొన్నారు.

పరీక్షల ముందు.. ఫలించిన ప్రయత్నాలు 
వర్సిటీ పూచీకత్తుతో హాజరుకానున్న 18 కళాశాలల విద్యార్థులు 
ఈనెల 19 నుంచి బీఈడీ మొదటి సెమిస్టర్‌ పరీక్షలు 
న్యూస్‌టుడే, కర్నూలు విద్య 

విశ్వవిద్యాలయంలో సీడీసీ విభాగం కీలకం. ఇది విద్యార్థుల ప్రవేశాలు, వసతులు, బోధన సిబ్బంది, తనిఖీలు వంటి అంశాలను పరిశీలిస్తుంది. ప్రైవేటు కళాశాలలు దీని ఆధీనంలోనే ఉంటాయి. ఈ ఏడాది 63 ప్రైవేటు బీఈడీ కళాశాలలు సీడీసీ గుర్తింపు లభించింది. ఏపీ స్టేట్‌ కౌన్సిల్‌ ఆఫ్‌ హయ్యర్‌ ఎడ్యుకేషన్‌ (ఏపీఎస్‌సీహెచ్‌ఈ) మార్గదర్శకాల మేరకు 50 కళాశాలల్లో ప్రవేశాలు జరిగాయి. ఆ మేరకు మొత్తం 2,270 మంది విద్యార్థుల సమాచారం ఆన్‌లైన్‌లో నమోదు చేశారు. మొదటి సెమిస్టర్‌ పరీక్షలకు యాప్సీ 32 కళాశాలలకుగాను 1,323 మంది విద్యార్థులకు మాత్రమే అనుమతి ఇచ్చింది. మిగిలిన 18 కళాశాలలకు సంబంధించి వర్సిటీ ‘అండర్‌ టేకింగ్‌’ (ష్యూరిటీ) ద్వారా 947 మంది విద్యార్థులు పరీక్షలు రాయనున్నారు. ఇందుకు ఆయా కళాశాలల యాజమాన్యాలు వర్సిటీ అధికారులపై పలు రకాలుగా ఒత్తిడి తేవడంతో పది రోజుల్లో యాప్సీ ద్వారా అనుమతులు తెచ్చుకోవాలని, లేకపోతే పరీక్ష ఫలితాలు నిలుపుదల చేయవచ్చని హామీపత్రాన్ని వర్సిటీ తీసుకుని పరీక్షలకు ఆమోదముద్ర వేసినట్లు తెలుస్తోంది.

19న నంద్యాలలో మీకోసం ప్రజాదర్బార్‌

కర్నూలు సచివాలయం, న్యూస్‌టుడే: మీకోసం ప్రజాదర్బార్‌ కార్యక్రమం వచ్చే సోమవారం నంద్యాల రెవెన్యూ డివిజన్‌లో నిర్వహించనున్నట్లు కలెక్టర్‌ ఎస్‌.సత్యనారాయణ ప్రకటనలో తెలిపారు. నంద్యాల ఆర్డీవో కార్యాలయంలో హాజరై ప్రజలు తమ వినతులను నేరుగా అధికారులకు సమర్పించుకోవాలని ఆయన సూచించారు.

చౌకదుకాణ డీలర్ల పరీక్షలు రద్దు

ఆదోని గ్రామీణం, న్యూస్‌టుడే : ఆదోని డివిజన్‌ పరిధిలోని చౌకదుకాణాల డీలర్ల స్థానాలకు సంబంధించిన నియామకపు పరీక్ష ఈ నెల 11వ తేదీన స్థానిక మిల్టన్‌ పాఠశాలలో నిర్వహించారు. పరీక్షకు ముందే ప్రశ్నపత్రం లీకేజీ అయింది. దీనిపై ‘ఈనాడు’లో ‘డీలరు పరీక్ష ప్రశ్నాపత్రం లీకేజీ.. ఆందోళనలో అభ్యర్థులు’ అనే శీర్షికతో కథనం రావడంతో అధికారులు విచారణ చేశారు. శనివారం కలెక్టరు సత్యనారాయణ ఆదోని డివిజన్‌ డీలరు పోస్టులు పరీక్షలు రద్దు చేస్తూ.. ఆదేశాలు జారీ చేశారని ఆదోని ఆర్డీఓ ఓబులేశు తెలిపారు. తదుపరి పరీక్షల తేదీని నిర్ణయించి ప్రకటిస్తామన్నారు. ఆదోని డివిజన్‌ వ్యాప్తంగా మొత్తం 82 పోస్టులకు గాను పలు ప్రాంతాల నుంచి మొత్తం 371 మంది అభ్యర్థులు పరీక్షలకు హాజరయ్యారు. కష్టపడి పరీక్షలు రాసిన అభ్యర్థుల్లో పరీక్షల రద్దుతో ఆందోళనకు గురవుతున్నారు. ఎవరో చేసిన తప్పునకు మేము బాధ్యులు కావాల్సి వచ్చిందని పలువురు అభ్యర్థులు వాపోతున్నారు. లీకేజీకి కారకులైన వారిపై కఠిన చర్యలు చేపట్టాలని వారు కోరుతున్నారు.

ముగిసిన పార్వేట ఉత్సవాలు 

ఆళ్లగడ్డ గ్రామీణ, న్యూస్‌టుడే: లక్ష్మీనృసింహ స్వామి పార్వేట ఉత్సవాలు ముగియడంతో శనివారం స్వామి పల్లకి అహోబిలానికి చేరుకొంది. ఆలయ ప్రధానార్చకులు కిడాంబి వేణుగోపాలన్‌, ట్రాన్స్‌కో ఏఈ రవికాంత్‌ చౌదరి, గ్రామస్థులు స్వామికి ప్రత్యేక పూజలు చేసి గ్రామంలోకి ఆహ్వానించారు. అనంతరం పల్లకిని మోస్తూ స్వామి వారిని ఆలయానికి తీసుకెళ్లారు. ఆలయ ముఖద్వారం వద్ద ప్రహ్లాదవరద, జ్వాలా నృసింహ స్వామి వారిని కొలువుంచి పంచామృతాలతో అభిషేకం జరిపారు. ఆ తర్వాత వేదమంత్రోచ్ఛరణలతో హోమం నిర్వహించారు. తదనంతరం స్వామి వారిని ప్రత్యేకంగా అలంకరించి భక్తులకు దర్శనమందించారు. అర్చకులు రాఘవ, మధు, మణియార్‌ సౌమ్యనారాయణ్‌ పూజలు చేశారు.

108 కేసులకు ప్రత్యేక ఓపీ 

కర్నూలు వైద్యాలయం, న్యూస్‌టుడే: జిల్లా వ్యాప్తంగా 108 వాహనాల్లో తీసుకొచ్చిన రోగులకు సర్వజన వైద్యశాలలోని అత్యవసర విభాగంలో ప్రత్యేకంగా ఏర్పాటు చేసిన ఓపీ కౌంటర్‌ను డీఎంహెచ్‌వో జేవీవీ ఆర్‌కే ప్రసాద్‌, ఆసుపత్రి పర్యవేక్షకులు డా.చంద్రశేఖర్‌ శనివారం ప్రారంభించారు. ఈ సందర్భంగా వారు మాట్లాడుతూ జిల్లా వ్యాప్తంగా 108 వాహనాల్లో అత్యవసర కేసులను తరలిస్తుంటారని, వీరు పెద్దాసుపత్రికి వచ్చాక ఓపీ తెచ్చుకోవడలో ఆలస్యం జరుగుతుండటంతో అత్యవసర వైద్యం అందించడంలో ఆలస్యం జరుగుతోందని, రోగులు వారి సహాయకులు ఓపీ తెచ్చుకోలేని పరిస్థితి ఉంటోందన్నారు. వారి ఇబ్బందులను దృష్టిలో ఉంచుకొని అత్యసర విభాగంలోనే ఓపీ ఏర్పాటు చేసినట్లు చెప్పారు.

లండన్‌: ఇసుక తవ్వకాలు అతిగా చేపట్టడంతో పర్యావరణానికి చేటుజరుగుతోంది. దీంతో భారత్‌ వ్యాప్తంగా తవ్వకాలపై ఆంక్షలు అమలులో ఉన్నాయి. ఫలితంగా నిర్మాణ రంగాన్ని ఇసుక కొరత వేధిస్తోంది. మరోవైపు 40 శాతం వరకూ ప్లాస్టిక్‌ వ్యర్థాలను నేలలో పూడ్చిపెడుతున్నారు. ఇవి మట్టిలో కలిసేందుకు చాలా ఏళ్లు పడుతుంది. ఈ రెండు సమస్యలకు పరిష్కారం చూపే దిశగా బ్రిటన్‌లోని బాత్‌ వర్సిటీ నిపుణులు కొత్త అధ్యయనం చేపట్టారు. కాంక్రీటులో ఇసుకకు బదులుగా ప్లాస్టిక్‌ను వినియోగించడంపై వారు దృష్టిసారించారు.  భిన్న మొత్తాల్లో పునర్వినియోగ ప్లాస్టిక్‌ను కలుపుతూ వారు 11 కాంక్రీటు మిశ్రమాలను తయారుచేశారు. వీటిపై చేపట్టిన విశ్లేషణలో.. దాదాపు 10 శాతం వరకూ ఇసుకను ప్లాస్టిక్‌తో భర్తీ చేసుకోవచ్చని వెలుగులోకి వచ్చింది. ఫలితంగా ఏటా 82 కోట్ల టన్నుల ఇసుకను ఆదా చేయొచ్చని బయటపడింది.

Page 2 of 2

తాజా వార్తలు

©2018 APWebNews.com. All Rights Reserved.