ఆదాయపు పన్ను చెల్లింపు సామాజిక బాధ్యత

ఆదాయపు పన్ను చెల్లింపు సామాజిక బాధ్యత 

పటమట, న్యూస్‌టుడే: ఆదాయపు పన్ను చెల్లింపు సామాజిక బాధ్యత అని, సమాజంలోని ప్రతి ఒక్కరూ తమ ఆదాయంలో కొంత ఆదాయ పన్ను రూపేణా సమాజానికి ఇవ్వాలని ఆదాయపు పన్ను శాఖ విజయవాడ (రేంజ్‌-2) సంయుక్త కమిషనర్‌ శేష శ్రీనివాస్‌ యేపూరి అన్నారు. బెంజిసర్కిల్‌ సమీపంలోని కృష్ణా జిల్లా లారీ యజమానుల సంఘం హాలులో లారీ యజమానులకు ఆదాయపు పన్నుపై అవగాహన కార్యక్రమాన్ని శుక్రవారం నిర్వహించారు.   ముఖ్యఅతిథిగా హాజరైన శేష శ్రీనివాస్‌ మాట్లాడుతూ 130 కోట్ల జనాభా ఉన్న దేశంలో కేవలం మూడు శాతం మంది మాత్రమే పన్ను చెల్లిస్తున్నారని చెప్పారు. ప్రభుత్వ లెక్కల ప్రకారం 65 శాతం మంది మధ్య తరగతి, ఎగువ మధ్యతరగతి ప్రజలు ఉన్నారని, దాని ప్రకారం చూసుకుంటే 40 కోట్ల మంది ఆదాయపు పన్ను చెల్లించాలని, కాని నాలుగు కోట్ల మంది మాత్రమే కడుతున్నారని తెలిపారు. పన్ను బాధ పెట్టడానికి, ఇబ్బంది పెట్టేందుకు కాదని, సంపాదించిన దానికి తగ్గట్లు, కొంత సంఘానికి ఇవ్వాలని పేర్కొన్నారు. పది లారీలు లోపు ఉన్నా, పైన ఉన్న అందరూ పుస్తకాల్లో తమ ఆదాయ, వ్యయాలు రాసి పెట్టుకోవాలని, ఆదాయం ఎక్కువైనా, తక్కువైనా రిటర్న్స్‌ మాత్రం తప్పనిసరిగా ఫైల్‌ చేయాలని స్పష్టం చేశారు. ఆదాయపు పన్ను శాఖ విజయవాడ సర్కిల్‌ 2 (1) డిప్యూటీ కమిషనర్‌ డాక్టర్‌ ఎస్‌.కె.సెంథిల్‌ కుమార్‌ మాట్లాడుతూ అధిక ఆదాయం కలిగిన వాళ్లు మన దేశంలో ఎక్కువ మంది ఉన్నా, చాలా మంది ఆదాయపు పన్ను చెల్లించడం లేదని వెల్లడించారు.

తాజా వార్తలు

©2018 APWebNews.com. All Rights Reserved.