సమాజానికి నైతికత నేర్పేదే నాటకం

సమాజానికి నైతికత నేర్పేదే నాటకం 
అట్టహాసంగా ‘హనుమ అవార్డ్స్‌’ ప్రారంభం 
ఆలోచింపజేసిన ‘ఆకాశ దేవర’ 
బలరామయ్య నటనకు ప్రశంసలు 

తిరుపతి (సాంస్కృతికం), న్యూస్‌టుడే: సమాజానికి నైతికతను నేర్పేదే నాటక రంగమని పలువురు వక్తలు పేర్కొన్నారు. కేంద్ర, రాష్ట్ర ప్రభుత్వ సాంస్కృతిక శాఖలు, సినిమా, టీవీ, నాటకరంగ అభివృద్ధి సంస్థ, తితిదే సంయుక్త సహకారంతో తిరుపతి అభినయ ఆర్ట్స్‌ ‘హనుమ అవార్డ్స్‌’ పేరుతో నిర్వహిస్తున్న 18వ జాతీయస్థాయి పద్య నాటకాలు, సాంఘిక నాటికలు, శాస్త్రీయ, జానపద, బృంద నృత్య పోటీలు శనివారం స్థానిక మహతి కళాక్షేత్రంలో వైభవంగా ప్రారంభమయ్యాయి. శనివారం ఉదయం నిర్వహించిన కార్యక్రమానికి ముఖ్య అతిథిగా హాజరైన చిత్తూరు ఎంపీ శివప్రసాద్‌ మాట్లాడుతూ సమాజ స్థితిగతులకు అద్దం పట్టేలా సాంఘిక నాటికలు ప్రదర్శిస్తున్నట్లు చెప్పారు. సమాజాన్ని ఇవి చైతన్యవంతం చేస్తున్నాయన్నారు. అదే సందర్భంలో పద్యనాటకాలను ప్రోత్సహించాల్సిన అవసరం ఉందన్నారు. నాటకోత్సవాలు విజయవంతం కావాలని ఆకాంక్షించారు. సాయంత్రం జరిగిన కార్యక్రమంలో తితిదే మాజీ డిప్యూటీ ఈఓ చిన్నంగారి రమణ మాట్లాడుతూ కళలను, కళాకారులను ప్రోత్సహించడానికి తితిదే తొలి నుంచి ప్రాధాన్యం ఇస్తోందన్నారు. ఏపీ నాటక అకాడమీ ఉపాధ్యక్షుడు కందిమళ్ల సాంబశివరావు మాట్లాడుతూ నాటకోత్సవాలను ప్రోత్సహిస్తామన్నారు. అభినయ ఆర్ట్స్‌ వ్యవస్థాపక కార్యదర్శి బీఎన్‌ రెడ్డి మాట్లాడుతూ సమాజాన్ని చైతన్యపరిచే శక్తిసామర్థ్యాలు కళలకు, కళాకారులకు మాత్రమే ఉన్నాయన్నారు.

©2018 APWebNews.com. All Rights Reserved.